سندرلا في بغداد..

اذهب الى الأسفل

سندرلا في بغداد..

مُساهمة من طرف أبن كركوك في الأربعاء 26 مارس - 4:26:44

سندرلا في بغداد

كان ياما كان في عتيك الزمان
جان اكو حاتة اسمها سندرلا خوش حاتة اصيلة و علمودها غنة حسام الاغنية مال
العكربة... المهم جان عدها مرة اب كلش خبيثة و جانت تشتغل وية الامريكان مترجمة و ابوها جان خطية يبيع قوايش مبردات حجم 1100 بعكد النصارى و احيانا يبيع شخاط فلّ خوش ازلمة جان مال اول ... و جانو الكل سايكين على سندرلا خطية روحي سوي الجوزة مال مولد فصلت ... روحي اوكفي سرة على الغاز... روحي لسهام العبيدي (واللي ميعرف سهام العبيدي هو مكة مول مال بغداد) اشتري شحاطات لخواتج (اللي همة جانو 3 خوات بس من غير اب هم خبيثات للهامة )... روحي شلعي الشتايكر مال السطح و رجعية مرة لخ... روحي جيبي لفات فلافل من فالح ابو العمبه (واللي ميعرفه هذا مثل برغر كينج بعمان)... روحي بدلي الدهن مال المولدة الاقصى كامت أتفحّط ...و هاي خطية جانت كلش حبااابة و تروح ولا تفتح حلكها (بس من جواها جان التقسيم مشتغل).... المهم الى أن يوم من الايام جانت دا تصعد مي بجليكان ابو ال 20 (المي ضعيف و الماطور ما ايصعد لان ماكو كهرباء) لكت بالطرمة فانوس بس شنو مزنجر و عتيك عبالك جان بدوائر الدولة و اتحوسم جتي علية فركتة و جرررب كام يطلع دخان سندرلللا انرعصت و ازبهّلت و رجعت خطوتين للخلف بسبب المفاجأة حتى اصطدمت بالدنكة (مع انه ما جان اكو دنكة) و كالت :هاي شنو العالم حتة هنا ايحركون زبل و تايرات؟؟؟شنو هالدخان هذا؟ الدخان شوية شوية اتحول الى جني لابس دريس مال برشلونة و بوتين اديداس وسوار ذهب و حاط معطر (فريدو فور مين) و كللها:-
-شبيك لبيك عبدك بين ايديك انا الجني رامي من العرصات شتريدين اسويلج بس عال سريع لأن ماما دكتلي مسكول لازم ارجع

-عمو جني اريد وطني 24 ساعة ممكن؟

-ولج بابا هوة اني ساحب واير 5 امبير من مولد للفانوس اشون اجيب الج وطني 24 ساعة؟ شنو جني لو وزير الكهرباء؟

-زين عمو عمو اريد قنينة مال غاز متروسة لأن امعوزين .....

-ولج عمو شنو هال حجي؟ ولج انتي شكد فكرية.. اكو واحد يطلب من جني قنينة مال غاز؟ شايفتني رابط الفانوس على الحصان؟

-عمو عمو لعد اشتكدر اتسويلي؟

-باعي عمو انتي بعدج صغيرة و محرومة و الامير راح ايسوي حفلة و ادري عائلتج راح اتروح شنو رايج لو اخليج اتروحين و تتونسين؟ احتمال اتطلعين اب صاية و صرماية لأن الشرقية هم دا اتصور هناك حفلة طاكة .

- زين اشون اروح عمو؟ نفرات لو كيا؟

-بابة معليج هسة غمضي عينج.... سندرلا غمضت عينها (و من الغريب يا جماعة انه اول ما غمضت عينها ما كامت اتشوف و هذا الشي محد لكالة تفسير لي هسه)و جررررب شافت سندرللا نفسها لابسة تنورة كصيرة و بدي و حذاء مفتوح يعني طلعت حااتة اللا مش ممكن.... الجني زرك لسهام العبيدي و طرق عال سريع ورقة و نص و جابلهيا لأن طلع لوكي مال حاتات عتيك

و كللها الحفلة تخلص بال 8 و نص علمود منع التجول و كل هاي الهدوم راح توكع و الحذاء و الميك اب و كلشي راح يختفي اذا عبرت ال 8 و نص و احتمال تنلعسين بالطريق


-حاضر عمو شكرااااااااااااااااااااااا..... هاي شكرا الطويلة مال الزعاطيط

وصلت سندرللا البيت الامير جان امسوي حفلة لان طلع 77 بالسادس حيروح اهلية احتمال او طب بيطري بعد ما اعرف و الحفلة جان بيها نجود و سمراء و ساجدة عبيد كلة هجع و عالكة هم جانت موجودة و الامير شاد الرباط على راسة و مقندل و صاير طلي و ردح لليافوخ و فجأة الامير صاد سندرلا و عجبتة و كابلها جتف ساعتين و ساندرلا نست روحها و نست الكراب و السراوات و البهذلة و نزلت ردح الى ان صارت 8 و نص ......اللهّّّّ!!!!! انلاصت اتذكرت الوصية مال رامي الجني و كالت لازم اشطح و ركضتلك عال سريع جنها برزلة هس توها امجفتة و الامير وراها
-وج تعاااي شبيج اتخبلتي؟مو دا احاجيج ؟؟؟ وين امولية ؟؟؟ فضيلة (هلكد ما سكران نسة اسمها) المهم ركضت سندرلا و جررب وكع الحذاء مالتها بلا ما تدري جان الامير ايشيل الحذاء و لزمة و ضل صافن عالعالم اللي انتبهو عاللقطة و كامو ايباوعون عليه.. الامير بقة شايل الحذاء و

مصدوم و صورة سندرلا الحلوة ببالة... الحفلة اتوقفت طبعا و العالم سكتت من المفاجأة

جان ايباوع الامير عا العالم ....صنطة.......و كال للناس :

الشركة العامة للصناعات الجلدية: فخر الصناعة الوطنية العراقية خبرة و تميز في مجال المصنوعات الجلدية من الأحذية و الحقائب بأرقى المواد الاولية الفرع الرئيسي :الكرادة قرب جسر ابو الطابقين
!!!!!!!!!!!!!!!!!!!
avatar
أبن كركوك
عضو نشيط

ذكر عدد الرسائل : 104
العمر : 35
البلد : ألعراق كركوك
تاريخ التسجيل : 19/03/2008

معاينة صفحة البيانات الشخصي للعضو http://www.kirkuk.alafdal.net

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى