قصتي مع أللفــــــه..

اذهب الى الأسفل

قصتي مع أللفــــــه..

مُساهمة من طرف أبن كركوك في الأربعاء 16 أبريل - 14:52:37

اليوم جنت جوعان وردت اروح اكلي لفه طلعت من البيت لكيت الطرق مزدوده والمحل بعيد مو مال مشي دورت على بايسكل ماكو والتكسيات طبعا اكيد ماكو رجعت للبيت واخذت السويج وبوجهي للسطح جبت جليكان ابو العشرين لتر وترست الهلكوبتر ورحت اشغل متشتغل طلع الباتري هابط جبت شاحنه مال نوكيا وكلت خلي اشحنها ,الهلكوبتر مابيها مكان حتى أوصل الشاحنه ,وبعد تفكير عميق توصلت الى حل ان اوصل الشاحنه بالصالنصه ,طبعا وصلت الشاحنه طلعت الكهرباء مطفيه المولد مال الشارع ممشغل رحت على مولد البيت اشغل مابيه بانزين والبانزين كله حطيته بالهلكوبتر جبت صونده ورحت للهلكوبتر طبعا هي كامت ترجف عبالها راح ابصطها ,سحبت منها بطل دم اقصد بطل بانزين حطيته بالمولد ,وبهاي الاثناء دك الموبايل وظليت اسولف (تعرفون بالسطح الشبكه قويه ومخابريني من الارضي) رجعت اشغل المولد ميشتغل طلع مابيه بانزين (صدك جذب هاستوني حطيتله بانزين) طلع المولد مزروف والبانزين كله صار بالكاع واني اباوع عليه , روحي طفرت وظربت المولد دفره وانكسرت رجلي بها الاثناء اجتي الوطنيه والطياره انشحنت ركبت بالطياره وشغلت وطلعت وبنص الطريق صادفتني أباتشي مال الامريكان رمشتله ودكلي هورن ونزلنه من الطيارات واصافحنا وجان يشوفنا ابو طياره حربيه نفاثه وشاف الكعده حلوه نزل واجه يمنه وبعد شويه منشوف الا صاروخ سترلة(ارض ارض) جاينه بالوجه كلمن ركب طيارته وبطنش وفلت ,بعدين طلعت بوجهي لمحل الفلافل ويا جماعتي (ابو النفاثه وابو الاباتشي )وصلنا للمحل طلع المحل معزل ,وبيت ابو الفلافل قريب عن المحل رحناله وصيحناله بمكبرات الصوت محد يطلع على الباب واحنا واكفين بالجو كمنه نظرب على الباب فشك حتى ندك الباب ,طلع ابو المحل وكال شتريدون كناله سلامتك روح ارجع نام ,فخنزر علينه ............... ابو النفاثه شمله قرص حراري ,ابو الفلافل جر بوش وراح فتح المحل ,وصينا كل واحد على لفه تكه وبما انه يبيع فلافل وميبيع تكه صارتله مشكله واحنا كاناله الا ناكل فد شي شوي لان الجماعة وياي ميعرفون شنو الفلافل , وبعدين اتوصلنا الى حل انو ناكل فلافل شوي (يعني فلافل بالشيش) , ابو المحل سوالنا 3 شياش
واكلنا الفلافل وحطينة وياهه عنبة وجماعتي الي وياي يصيحون (انبة انبة) , وجينة دننطي الحساب كال خلوهه علية (طبعا هو ديتلوك) وحنة مجذبنة خبر وخليناها عليه ورحنا بعدين ودعت الجماعة ورجعت للبيت وبنص الطريق مااحس الا اني اندعمت بفد شي شنو هو ماادري شلت راسي وشفت نفسي واكع من الفراش و طلع هذا كلهه حلم بس الغريب اني شبعان والكطن مال المخده كله ماكو طلعت اني ماكله ......................
avatar
أبن كركوك
عضو نشيط

ذكر عدد الرسائل : 104
العمر : 35
البلد : ألعراق كركوك
تاريخ التسجيل : 19/03/2008

معاينة صفحة البيانات الشخصي للعضو http://www.kirkuk.alafdal.net

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى